A li pedi di la cruci

A LI PEDI DI LA CRUCI

***********************
Pirchi nun scinni ?
Chi fa' a pinnuluni1
'nchiuvatu2 ancora
nni'sta cruci
pi li mani e pi li pedi
cu lu cori spaccatu
ca ti scula
sangu e amuri ?
Pirchì nun scinni ?
Chi fa'
cu l'occhi aperti
a taliàri3 ancora
li giuda di la terra ?
Scinni,
nun mòriri
si prima nun aggiusti
'stu munnu sfasciatu
chinu di cruci
e di genti ca chianci,
pòvira comu tìa !
Scinni,
scinni di'stu lignu
camulutu4 di li séculi :
lu pòviru t'aspetta.

1Pinnuluni -penzoloni

2'Nchiuvatu - inchiodato

3Taliàri - guardare

4Camulutu - tarlato

Stefano Bissi - "Sciuriddi di lu me paisi", Agrigento-Palermo 1982.